Dessertlar

Kremli ponchiklar, yoki ‘doughnuts’

Blogda oldin ham ponchiklarning retsepti bilan bo‘lishganman. Bu safargi retsept ularning ichiga krem to‘ldirilgan turidir. Bu ponchiklar eng sevimli shirinliklaringizdan biriga aylanishiga ishonchim komil.

Kerakli mahsulotlar (8 dona ponchik uchun):

Xamiriga:

200 ml sut
1 dona tuxum
300 gr un
1 osh qoshiq shakar
1 choy qoshiq xamirturush (droja)
20 ml eritilgan sariyog‘ yoki margarin
Ozgina tuz

Kremi uchun:

300 ml sut
1.5 osh qoshiq un
1 dona tuxum
100 gr shakar
Ozgina vanilin

Ustiga sepish uchun:

Mayda shakar yoki eritilgan shokolad yoki shakarli glazur

Qo‘g‘irish uchun: 0.5 litr o‘simlik yog‘i

Ponchik uchun xamir tayyorlash

Buning uchun iliq sut, shakar va xamirturushni aralashtirib olamiz.

Keyin ularning ustiga tuxum va eritilgan margarinni qo‘shamiz.

Endi elangan un va tuzni qo‘shib yumshoq xamir qoramiz. Xamirga yaxshilab ishlov beramiz. Ustini o‘rab 1 soat davomida oshiramiz.

Ponchik uchun krem tayyorlash

Krem uchun kerakli hamma mahsulotlarni qozonchaga solamiz.

So‘ngra o‘rtacha balandlikdagi olovga qo‘yamiz. Krem quyulguncha tinmay aralashtiramiz. Krem quyulgach olovni o‘chiramiz.

Uni boshqa idishga quyib olamiz. Ustini sellofan bilan . Sellofan kremning ustiga tegib turishi kerak.

Endi oshib chiqqan xamirni 1.5 sm balandlikda un sepilgan yuzada yoyib olamiz.

Keyin doira shaklidagi narsa bilan kesib olamiz. Men stakandan foydalandim. Orasidan chiqqan xamirni yana zuvala qilib yoyib olamiz.

Shakl berilgan ponchiklarning ustini o‘rab yana 20 minut tindiramiz.

Ponchik pishirish

Kichkina tovaga yog‘ni quyamiz (qancha yog‘ quyish tovaning kattaligiga bog‘liq).

Qizigan yoqqa 2 yoki 3 tadan ponchiklarni solib o‘rtacha olovda ikkala tomonini qizartirib pishiramiz.

Pishib chiqqan ponchiklarni qog‘oz sochiqqa qo‘yamiz. Ortiqcha yog‘ini tortib oladi.

Keyin ularni sovitishga qo‘yamiz. Agar ponchiklarning ustiga mayda shakar sepilsa, unda issiqligida sepish kerak. Men bir qismiga sepdim.

Ponchiklar biroz sovigach, ularning bir chekkasidan teshib olamiz (rasmga qarang). Buning uchun men cho‘pdan foydalandim. Cho‘pni kirgizib, biroz aylantirilsa teshik sal kattalashadi.

Endi kremni konditer qopchasiga solamiz. Ponchiklarning ichini krem bilan to‘ldiramiz.

Ponchiklar tayyor.Ularni shunday dasturxonga ham tortsa bo‘ladi yoki ta’bga qarab bezatish mumkin. Men pochiklarning bir nechtasini eritilgan shokoladga botirib oldim.

Yana bir qismini esa shakarli glazurga botirdim. Bezatilgan ponchiklar ayniqsa yosh bolalarga juda yoqadi.

Shakarli glazurni tayyorlash

Buning uchun bitta tuxum oqini ko‘pirtiring (men quritilgan tuxum oqidan foydalandim) va keyin uning ustiga 5-6 osh qoshiq shakar kukunini qo‘shing va yana biroz ko‘pirtirib oling.