Osetiya pirogi – karamli pirog

Bu pirog Osetiya oshxonasiga tegishlidir. U pishloq va sabzavotlar aralashmasidan tayyorlanadi.Osetiya pirogi uchun sabzavotlardan asosan karam yoki ko‘katlar ishlatiladi. Osetiyada bu pirog dasturxonga uch donadan qo‘yiladi. Bular yer, osmon va quyoshni bildiradi. Vegetarian, mazali va oson retsept.

Kerakli mahsulotlar (3 dona 30 smli pirog uchun):

Xamiriga:

600-700 gr un
200 ml sut
100 ml suv
7-8 gr xamirturush
3 osh qoshiq o‘simlik yog‘i
1 choy qoshiq shakar
1 choy qoshiq tuz

Pirog ichini to‘ldirish uchun:

1 dona karam
200 gr feta pishlog‘iyoki brinza
1 dona piyoz
200 gr cheddar yoki shunga o‘xshash qattiq psihloq turi
2-3 dona ko‘k piyoz
Tuz va murch
1 osh qoshiq o‘simlik yog‘i

Pirog uchun xamir qorish

Avval iliq suvga ozgina un soling. Keyin unga xamirturush va shakar aralashtiring. Aralashmani 5-10 minut qoldiring, xamirturush ishga kirishi uchun.

Vaqt o‘tgach aralashmaga unning qolgan qismini, tuz va sutni quying. Suyuqroq xamir qoring. Xamir qo‘lga yopishoqoq va biroz suyuqroq bo‘lishi kerak.

Unga biroz ishlov bering. Endi o‘simlik yog‘ini oz-ozdan quyib, qo‘l bilan xamirga ishlov berishda davom eting. Yog‘ quyilgandan so‘ng xamir qo‘lga yopishmaydigan bo‘lib qoladi.

Endi xamirning ustini o‘rab 1 soat davomida oshiring. Bu vaqtda qiymani tayyorlab turing.

Osetiya pirogi uchun qiyma tayyorlash:

Tovaga yog‘ni quying. Qizigach mayda to‘rg‘algan piyoz va ko‘k piyozni soling.

Ular biroz qo‘g‘irilgach, mayda to‘rg‘algan karamni ham soling. Karam yumshaguncha past olovda ustini yopib pishiring. Ta’bga qarab tuz va murch soling.

Endi olovni o‘chirib qiymani sovitish uchun bir chetga surib qo‘ying.

Karam sovigach uning ustiga qirg‘ichdan o‘tkazilgan pishloqni soling.

Osetiya pirogini tugish

Yana xamir bilan ishlashga qayting. Oshib chiqqan xamirni yog‘langan yuzaga qo‘ying. Uni 3ga bo‘lib oling.

Endi bitta xamirni olib, yog‘langan qo‘l bilan biroz yoyib oling. Yoyilgan xamirning o‘rtasiga qiymaning 1/3 qismini soling. Chetlarini bitta joyga olib keling (rasmga qarang).

Keyin xamirni yog‘langan listning ustiga qo‘ying. Qo‘l bilan 30 sm atrofida ehtiyotkorlik bilan yoyib oling.

Pirogning o‘rtasiga kichkina teshik qiling, bug‘ chiqib ketish uchun.

Osetiya pirogining ustini biroz yog‘lab 220-230°Cda qizib turgan duxovkada 15 minut davomida yoki usti och tilla rang bo‘lguncha pishiring.

Ishib chiqqan pirogning ustiga sariyog‘ surkang. Pirogning qolganlarini ham shu usul bilan pishirib oling.

Piroglar tayyor, ularni issiqligida dasturxonga torting. Bu pirog yengil va mayin bo‘ladi.

E’tibor qiling:

Pirogning xamiriga ko‘p un solib yubormang. Bo‘lmasa pirogning xamiri mayin bo‘lmaydi.

Bu pirogning asl retsepti osetiya pishlog‘i bilan tayyorlanadi. Lekin osetiya pishlog‘ini topish ancha mushkul. Shuning uchun men cheddar va feta pishlog‘idan foydalandim, bu pirogning mazasiga ta’sir qilmaydi.