Paxlavaning bu turi Qrim paxlavasi nomi bilan tanilgan. U menga o‘zbek to‘y marosimlarini eslatadi. Afsuski hozirda mazali Qrim paxlavasini bozordan topish amri mahol. Shuning uchun men uni uyda tayyorlashni tavsiya etaman. Uyda tayyorlangan paxlava juda mazali bo‘ladi. Doim yaxshi natija beradigan retsept. Men ham yaqinda oilam va hamkasblarim uchun Qrim paxlavasi tayyorlab berdim. Hammaga birdek manzur bo‘ldi.
Idishda sut, eritilgan sariyog‘, tuz va choy sodasini aralashtirib oling.
Endi ustiga elangan unni soling va xamir qoring. Xamirga 7-8 minut ishlov bering.
Keyin uni zuvalalarga bo‘ling. Men 4 ga bo‘ldim. Ularni o‘rab 20-25 minut tindiring.
Vaqt o‘tgach, bitta zuvalani olib yupqa doira shaklida yoyib oling. Xamirning ortidan stol ko‘rinadigan yupqalikdan. Bu yoyilgan xamirni dasturxonga yoyib turing, qayzishi uchun. Ungacha keyingi xamirni yoyib oling va uni ham qayziting.
Odatda men to‘rtala zuvalani ham yoyib olaman. Hamma yoyilgan xamirning ikkala tomonini ham qayzitish kerak. Buning uchun paxlava xamirini o‘qlovga o‘rab, ontarib olish kerak. Bu jarayon xuddi chak-chakning xamirini qayzitishga o‘xshaydi.
Endi birinchi yoyilgan xamirni oling. Uni 3-4sm kenglikda rulet qilib o‘rang. O‘rash doiraning yarmiga kelganda, xamirning chetlariga biroz suv tekkizing. Keyin xamirni yana o‘rashda davom eting.
O‘ralgan ruletni 2 sm qalinlikda diagonal yo‘nalishda kesib chiqing. Kesma o‘tkir burchak ostida bo‘lishi kerak.
Kesilgan paxlavani qo‘l bilan biroz to‘g‘irlab, stolga terib oling.
Xamirning qolgan qismini ham shunday tayyorlab oling.
Ikkinchi tugish usuli uchun quyidagi rasmlarga qarang.
Yog‘ni qozonchaga quying va qizdiring. Endi qizigan yog‘ning ustiga 2-3 dona paxlava soling. Ikkala tomoni tilla rang bo‘lgunicha qo‘g‘iring. Vaqti-vaqti bilan ontarib turing.
Pishgan paxlavani qog‘oz salfetkaga qo‘ying (ortiqcha yog‘i tortiladi). Hamma paxlavani shu usul bilan pishirib oling. Agar qozonchada yog‘ ozayib ketsa, yana to‘ldiring.
Qozonchada suv va shakarni aralashtiring. Aralashmani o‘rtacha olovda 10 minut atrofida qaynating. Suvning ustida katta-katta shakarli pufaklar paydo bo‘la boshlaydi. Endi asalni qo‘shing va yana 7-8 minut qaynating. Sirop tayyor.
Sovigan paxlavalarni issiq siropga botirib oling. Xohishga qarab ustiga kunjut urug‘i seping. Yana maydalangan yong‘oq yoki pista ham sepish mumkin.
Paxlava tayyor. Uni choy bilan dasturxonga torting.
Xamir yaxshi tindirilsa uni yoyish oson bo‘ladi.
Yoyilgan xamirni qayzitish muhim. Bo‘lmasa u o‘ralganda yopishib qolishi mumkin.
Sirop soviganda quyuqlashadi. Uni yana olovga qo‘yilsa, u yana suyuqlashadi.
Blogda boshqa siropli dessertlarning retseptini ham topasiz. Masalan, kokosli keks yoki basbusa.
Veb sahifa: www.juvajon.com
Medovik tortining retseptlari juda ko‘p. Hammasi o‘ziga yarasha mazali va… Qolganini o'qish
Qizil barxat torti AQSHning Mariland shtatida XX asrning boshlarida paydo… Qolganini o'qish
Bolonya spagettisi Italiyaning shimolida joylashgan Bolonya shahrida birinchi marta tayyorlangan… Qolganini o'qish
Afg‘oncha napoleon torti O‘zbekistonda keng tarqalgan tortlardan biri. Uning mazasi… Qolganini o'qish
Frittata juda mazali, hamda oqsil va vitaminlarga boy. Nonushta yoki… Qolganini o'qish
Oshqovoqli karri yana bir ajoyib hind taomidir. Bu sog‘lom va… Qolganini o'qish