Ratatuy (Ratatoulli) – Fransuz taomi

Bugun sizlarni Ratatuy tayyorlash bilan tanishtiraman. Bu taomni, yoki shu nomli multfilmni, eshitganlar ko‘p bo‘lsa kerak. Ratatuy bu Fransiyaning Nice (Nitsa) shahrida paydo bo‘lgan taomdir. Ratatuyni yoz oylari va kuzning boshlarida tayyorlash juda qulay. Bu mazali va sog‘lom taomni tayyorlash unchalik qiyin emas. Marhamat retsept bilan tanishing.

Kerakli mahsulotlar (4-5 portsiya uchun):

2 dona baqlajon
1 dona zukkini (yashil qovoq)
3-4 dona pomidor
1 dona sariq yozgi qovoq (marrow)
2 dona bulg‘or qalampiri

Sousi uchun:

4-5 dona pomidor
1 dona piyoz
2 dona chesnok tishi
1 dona bulg‘or qalampiri
3-4 osh qoshiq zaytun yog‘i
Yarim bog‘ rayhon
1 dona seldr
2 dona lavr bargi
3-4 dona pomidor
Ozgina shakar
Tuz va murch
Yarim choy qoshiq kekik (тимьян)
Yarimta limonning sharbati
Ozgina sirka

Eng birinchi bo‘lib ratatuy uchun baqlajonlarni yupqa qilib, diagonal yo‘nalishda kesib olamiz. Keyin ularni tuzli suvga ivitib qo‘yamiz. Baqlajonning taxir ta’mi chiqib ketishi uchun.

Ratatuy uchun sous tayyorlash

Tovaga 2 osh qoshiq zaytun yog‘ini quyamiz. Yog‘ qizigach, uning ustiga mayda to’rg’algan piyozni solamiz.

Piyoz biroz qo‘g‘irilgach uning ustiga to‘rg‘algan seldr, bulg‘or qalampirini solamiz.

Keyin to‘rg‘algan chesnokni qo‘shamiz. So‘ng ezilgan pomidorlarni solamiz. Ustiga 100 ml atrofida suv quyamiz (suvning miqdori pomidorning qanchalik suvli ekanligiga bog‘liq).

Pomidor biroz pishgach unga sirka va limonning sharbatini qo‘shamiz. Ularning ortidan esa shakar, tuz, murch va kekikni solamiz.

Eng oxirida rayhon barglari va lavr bargini solamiz. Ratatuy uchun sousni 20 minut atrofida past olovda qaynatamiz.

Keyin olovni o‘chiramiz. Lavr bargini olib tashlaymiz. Endi sousni blenderda ezib olamiz. Sous tayyor.

Ratatuy tayyorlash

Sabzavotlarning hammasini diagonal yo‘nalishda kesib olamiz. Ularni baqlajonning hajmiga moslashga harakat qiling.

Endi issiqqa chidamli idishni yog‘laymiz. Uning ustiga ratatuy uchun sousni quyamiz.

Bittadan baqlajon, pomidor, bulg‘or qalampiri, yashil va sariq yoz qovoqlarini qator teramiz va sousning ustiga qo‘yamiz. Sabzavotlarning hammasini shunday usulda terib chiqamiz.

2 osh qoshiq zaytun yog‘i, to‘rg‘algan rayhon barglari, tuz va murch aralashtiramiz. Bu aralashmani terib chiqilgan sabzavotlarning ustiga surkaymiz.

Endi ratatuyni 190⁰Cda qizib turgan duxovkada 40 minut ustini o‘rab pishiramiz. Keyin esa 20 minut ustini ochib pishiramiz. Hammasi bo‘lib ratatuy pishishiga 1 soat vaqt ketadi.

Tayyor ratatuyni dasturxonga issiqligida tortamiz. Odatda ratatuy baget noni bilan dasturxonga tortiladi. Blogda fransuz bagetining retseptini ham topasiz.

E’tibor qiling:

Ratatuy uchun sousni blenderda ehtiyotkorlik bilan aralashtiring. Chunki issiq sous kuydirishi mumkin. Xohlasangiz sousni oldin sovitib keyin blenderda ezing.

Ratatuy ertasiga ham juda mazali bo‘ladi, faqat tanovuldan oldin isitish kerak.