Kalzone (Calzone) – yana bir italyancha taom

Bu Italyancha taom 18 asrda Italiyaning Neapol (Naples) shahrida paydo bo‘lgan va shundan beri u ko‘p joylarda tayyorlanadi. Hozirda Italiyanig turli hududlarida o‘z kalzone tayyorlash usuli bor. Uning mazasi pizzadan farq qiladi va kalzonda pishloq ko‘p bo‘ladi.

Kerakli mahsulotlar (8 dona kalzone uchun):

Xamiriga:

7 gr xamirturush (droja)
1 osh qoshiq zaytun (olivka) yog‘i
1 choy qoshiq tuz
300 ml suv
1 choy qoshiq shakar
1 dona tuxum (ustiga surkash uchun)
500 gr un
1 osh qoshiq mannaya krupa

Ichiga solish uchun:

400 gr mozzarella pishlog‘i
200 gr parmazan
200 gr cheddar yoki boshqa qattiq pishloq turi
400 gr har xil kolbasalar (men halol salyami va tovuq go‘shtidan ishlatdim)

Iliq suv, xamirturush va shakarni aralashtirib oling. Uni idishdagi elangan un va tuzni aralashmasiga quying. Zaytun yog‘ini quying va xamir qoring. Keyin xamir silliq bo‘lguncha unga ishlov bering va ustini o‘rab iliq joyda oshiring.

Oshib chiqqan xamirni 8 ga bo‘lib zuvala qiling.

Keyin bitta xamirni 22 sm doira shaklida yoyib oling.

Xamirning bir tomoniga go‘sht va qirg‘ichdan o‘tkazilgan pishloqdan aralashtirib soling.

Endi xamirning ikkinchi tomonini yopib, kalzonga yarim oy shaklini bering va rasmda ko‘rsatilgandek qilib tugib oling. Ustiga ikki yoki uch joyidan kesib qo‘ying, bug‘ chiqib ketishi uchun.

Kalzoneni fergament qog‘oz solingan va mannaya krupa sepilgan listga qo‘ying.

Kalzoneni ustiga ozgina zaytun yog‘i qo‘shilgan tuxum surkang va 250°C yoki duxovkaning eng baland gradusida 15 minut pishirib oling.

Kalzone pishib chiqqach uni bir past sovitib dasturxonga torting.

E’tibor qiling:

Listga fergament qog‘oz solish shart emas, lekin kalzone pishayotganda pishloq oqib chiqadi.

Kalzonega pishloqning boshqa turlari, masalan, mascarpone turidan ham foydalanish mumkin.

Yoqimli ishtaha!!!

Blogda pizzaning retseptini ham topasiz. Yana lahmakun yoki turkcha pizza nomi bilan tanilagan turk taomining retsepti ham bor.

Telegram kanalimizga ulaning

Veb sahifa: www.juvajon.com