Kuskus do‘lma- go‘shtsiz sog‘lom taom

Do‘lmaning turlari juda ko‘p. Bugun uning italyancha vegetarian turi bilan tanishtiraman. Kuskus do‘lma mazali, sog‘lom va tayyorlashga oson taomdir. Marinara sousining ichida pishgan kuskus do‘lma juda mazali chiqadi.

Kerakli mahsulotlar (7-8portsiya uchun):

8 dona bulg‘or qalampiri
300 gr kuskus
2 dona piyoz
300 gr mozzarella pishlog‘i
20-30 gr parmazan pishlog‘i
3 dona chesnok tishi
1 dona sabzi
2 dona katta yoki 150 gr cherri pomidor
3 dona pomidor qoqi (xohishga qarab)
3 osh qoshiq zaytun yog‘i
Ozgina rayhon
100 gr yashil loviya

Marinara sous uchun

6-7 dona yaxshi yetilib pishgan pomidor
2 dona piyoz
3 dona chesnok tishi
Ozgina rayhon yangisi yoki quritilgani
Yarim choy qoshiq oregano quritilgani
Tuz, murch va shakar (ta’bga qarab)
1 osh qoshiq zaytun yog‘i

Kuskus do‘lma uchun marinara sousi tayyorlash

Buning uchun piyoz va chesnokni maydalab zaytun yog‘i bilan biroz qizartirib qo‘g‘irib oling. Keyin ularning ustiga mayda to‘rg‘algan pomidor, rayhon, oregano, tuz, murch va shakarni qo‘shing. 200 ml atrofida suv quying. Sousni 30 minut atrofida o‘rtacha olovda qaynating. Keyin olovni o‘chiring. Marinara sousi tayyor. Endi uni darrovda yoki keyinroq ishlatish mumkin.

Kuskus do‘lma uchun kuskusni tayyorlash

Buning uchun tovaga zaytun yog‘ini quying. Qizigan yog‘da piyozni qo‘g‘iring. Keyin uning ustiga mayda to‘rg‘algan chesnok, yashil loviya va qirg‘ichdan o‘tkazilgan sabzini qo‘shing.

Pomidor, rayhon va qoqini ham to‘rg‘ab soling.

Endi kuskusni soling va aralashtiring. Tuz va murch seping. Kuskusning ustini yopadigan darajada suv quying. Olovni darrovda o‘chirib tovaning ustini yoping.

5-8 minut orasida dam yediring. Bu orada kuskus yumshab pishadi. Aralashma biroz sovigach unga mozzarella pishlog‘ini mayda to‘rg‘ab soling. Pishloqning ozginasini do‘lmaning ustiga sepish uchun olib qo‘ying.

Kuskus do‘lmani tayyorlash

Bulg‘or qalampirlarini o‘rtasidan bo‘lib oling. Urug‘ini olib tashlang. Yuvilgan bulg‘or qalampirining ichini kuskusli aralashma bilan to‘ldiring.

Endi ularni tubiga marina sousi solingan issiqqa chidamli idishga terib chiqing. Men ikkita idishga sig‘dirdim. Do‘lmalarning ustiga qirg‘ichdan o‘tkazilgan mozzarella va parmazan pishlog‘idan seping.

Kuskus do‘lmani 180⁰Cda qizib turgan duxovkada 30 minut atrofida pishiring.

Do‘lma pishgach uni dasturxonga torting. Ta’bga qarab taomning ustiga rayhon sepish mumkin. Men do‘lmalarning yonida brokolli ham pishirdim va uni birgalikda dasturxonga tortdim.