Duxovkada qo‘zichoq go‘shti

“Roast lamb”, ya’ni qo‘zichoq go‘shti, inglizlarning an’anaviy yakshanba kuni tushlikka yeyiladigan ovqati. Uni “Sunday roast” deb ham atashadi. Ayniqsa bayram kunlari atrofidagi oilaviy yig’ilishlarda albatta dasturxonda bo’ladi.

Kerakli mahsulotlar: (7-8 portsiya uchun)

• Qo‘y yoki qo‘zichoq go‘shti (menda 2.5kg qo‘zichoq go‘shti)
• 1 osh qoshiq zaytun yog‘i
• Ozgina yangi yoki quritilgan rozmarin (agar bo‘lsa)
• Ta’bga qarab tuz va murch.
• 3-4 dona sabzi
• 2 dona piyoz
• 5 dona chesnok tishi

Eng avvalo go‘shtni xona haroratida, yoz oylarida yarim soat, qish oylarida esa 1 soat qoldiramiz. Bir osh qoshiq zaytun yog‘iga ozgina tuz va murch solib go‘shtning ustiga surkab olamiz.

Endi yana ozgina tuz, murch va rozmarinni (agar bo‘lsa) idishchada aralshtirib, ularning ustiga uzunasiga bo‘lingan chesnok donalarini solamiz.

Pichoq bilan go‘shtning ustiga kichkina cho‘ntakchalar qilib chiqamiz.

U cho‘ntakchalarga tuz va murchga bulangan chesnokni bitta-bitta solib chiqamiz.

Sabzi, chesnok va piyozlarni tozalab, yog‘langan listga qo‘yamiz. Ularning ustiga ham tuz va murch sepamiz. Sabzavotlar ustiga go‘shtni joylaymiz. Endi go‘shtni 190C° da qizib turgan duxovkaga pishirgani solamiz.

Odatda 1kg qo‘y go‘shti pishishi uchun 50 minut vaqt ketadi, ya’ni 2kg go‘sht uchun 100 minut kerak. Vaqtni nechi kg go‘sht pishirayotganingizga qarab o‘zingiz belgilang.

Belgilangan muddat o‘tgach go‘shtni olib tekshirib ko‘ring. Men ovqat uchun mo‘ljanlangan termometer ishlatdim va go‘shtning ichki temperaturasi 79C° bo‘lganini ko‘rdim. Qo‘y go‘shti ichki temeraturasi 75C° bo‘lganda pishadi.

Go‘sht pishaganligini tekshirishning yana bir yo‘li, uning eng qalin joyiga pichoq sanchib ko‘rish. Agar sizib chiqayotgan sharbati tiniq bo‘lsa, go‘sht pishgan bo‘ladi.

Endi pishgan go‘shtning ustini o‘rab 20-30 minut dam oldiring.

Yarim soat o‘tgach, go‘sht hali ham issiq bo‘ladi. Endi uning yonidagi sabzavotlar va duxovkada pishgan kartoshka bilan dasturxonga torting (kartoshka retseptini ham kanaldan topasiz). Inglizlar yana bu go‘shtni yalpizli sous bilan birga tanovul qilishni yoqtirishadi.

E’tibor qiling:

Go‘shtni alabatta pishirishdan oldin, xona haroratida qoldiring, bo‘lmasa go‘shtning usti ortiqcha pishib, ichi pishmay qoladi.

Pishgan go‘shtni kesishdan oldin, albatta dam yediring, bo‘lmasa hamma sharbati tashqariga chiqib ketib, go‘sht quruq bo‘lib qoladi.

Go‘shtni ortiqcha pishirib yubormang, bo‘lmasa quruq bo‘lib qoladi.

Rozmarin qo‘shilmasa ham bu ovqat mazali bo‘ladi. Men original retsepti bo‘yicha yozdim, lekin rozmarinsiz ham tayyorlasa bo‘ladi.

Yoqimli ishtaha!!!

Blogda boshqa go’shtli taomlar retseptlari bilan ham tanishing. Masalan Grekcha Kleftiko, yoki Qozonda mol go’shti tayyorlab ko’ring.

Telegram kanalimizga ulaning