Kimchi (Tuzlangan karam) | Juvajon

Kimchi dunyoga mashhur Koreya taomidir. Kimchining juda ko‘p turi bor. Uni har xil sabzavotlardan tayyorlashdi. Lekin asosan karamdan tayyorlayman. Hozirda kimchi dunyoning ko‘p joylariga tarqalgan. U inson salomatligi uchun foydali bo‘lgan taomlar ro‘yxatiga kiradi. Kimchining foydasi juda ko‘p, chunki unda foydali bakteriya va probiotiklar bo‘ladi. Bugun uy sharoitda oz miqdorda kimchi tayyorlashning retsepti bilan bo‘lishaman.

Kimchi uchun napa karam turi kerak bo‘ladi. Napa karam Xitoy karamining bir turidir

Kerakli mahsulotlar (1 dona katta karam uchun):

1 dona napa karam turi
1 dona koreys turpi (oq turp)
1-2 dona sabzi
50 gr tuz

Sous uchun

4-5 dona chesnok tishi
30 gr atrofida zanjabil
1 dona piyoz
Yarimta nok
60-100 gr koreys qizil qalampir qurug‘i
3 osh qoshiq baliq sousi (fish sous)
1 osh qoshiq shakar
50 ml suv
Yarim osh qoshiq guruch uni yoki kraxmal

Kimchi uchun sabzavotlarni tayyorlab olish

Buning uchun yuvilgan karamni o‘rtasidan diagonal yo‘nalishda bo‘lamiz.

Endi yana bir marta bo‘lib olamiz. Keyin 3×4 sm kattalikda kesib olamiz.

Sabzini ham ingichka qilib to‘rg‘ab olamiz. Turpni ham somoncha qilib to‘rg’aymiz.

Bu sabzavotlarni idishga katta idishga solib, ustidan 50 gr tuz sepamiz. Agar topsangiz koreys tuzidan foydalaning.

Endi ularning ustiga sovuq suv quyamiz. Suz sabzavotlarni ko‘mib turadi. Buni 2-3 soatga bir chetga surib qo‘yamiz.

Kimchi uchun sous tayyorlash

Buning uchun birinchi bo‘lib kraxmal va suvni pishirib olamiz. Sovuq suvga kraxmalni qo‘shing yaxshilab aralashtiring.

Endi uni past olovga qo‘ying. Quyulguncha tinmay aralashtirib turing. Sous quyuqlashgach shakarni soling. Endi olovni o‘chiring. Aralashmani sovitish uchun olib qo‘ying.

Piyozni qirg‘ichning mayda ko‘zidan chiqarib oling. Chesnok, nok va zanjabilni ham qirg‘ichdan chiqaring.

Endi ularning ustiga kraxmalli aralashmani qo‘shing. Keyin baliq sousi va qalampir maydasini aralashtiring.

Kimchi tayyorlash

Sabzavotlarning suvini to‘kib tashlang.

Endi qizil sousni karam sabzavotlarga qo‘l bilan surkab chiqing.

Kimchini reaksiyaga kirishmaydigan idishga bosib soling. Men shisha bankalardan foydalandim.

Bankalarni qopqog‘ini yoping, lekin oxirigacha buramang. Bo‘lmasa kimchidan gaz chiqa boshlaganda, bankada bosim kuchayadi. Natijada banka portlashi mumkin.