Yeryong‘oq pastasi (Peanut butter) | Juvajon

Yeryong’oq pastasi tarkibida magnezium, kaliy va rux kabi muhim vitaminlar va minerallar bilan birga juda ko’p miqdorda oqsil mavjud. Me’yorida iste’mol qilingan yeryong‘oq pastasi vazn tashlashga, yurak salomatligini yaxshilashga, qondagi qand miqdorini muallaq ushlash va ko‘krak bezi kasalliklarini oldini olishda yordam beradi. Bundan tashqari muskullar o‘sishini ham ta’minlaydi.

Quyida uni uy sharoitida qanday tayyorlashni tushuntiraman. Uyda tayyorlangan yeryong‘oq pastasi palma yog‘idan holi bo‘lib u 100% yeryong’oqning o‘zidan tayyorlanadi. Demak zararli moddalardan holi. Faqat sanoqli brendlar uni palma yog‘isiz tayyorlaydi. Oson va sog‘lom retsept.

Kerakli mahsulotlar (200 gr atrofida pasta uchun):

300 gr yeryong‘oq (po‘chog‘i bilan o‘lchangan)
Ozgina tuz

Pasta uchun yeryong‘oq pishgan bo‘lishi kerak. Buning uchun qozon yoki duxovkadan foydalanish mumkin. Men duxovkada tuzsiz tayyorlangan tayyor yeryong‘oqdan foydalandim.

Yeryong’oqni po‘chog‘i va po‘stidan ajratib oling. Endi uni blender yoki ‘chopper’ga soling. Blenderni yoqing.

Yeryong‘oq oldin un shakliga kiradi.

Keyin asta sekin bir-biriga yopisha boshlaydi. Shu vaqt tuzni ham qo‘shing.

Yana aralashtirishda davom eting. Endi yeryong‘oqning yog‘i chiqa boshlaydi. Ora-orada blenderni to‘xtatib, qoshiq bilan blenderning devolidagi yeryong‘oq pastasini ham aralashtirib turing.

Pasta tayyor. Uni darrovda yoki keyinroq dasturxonga torting. Odatda yeryong‘oq pastasi non bilan birgalikda yeyiladi. Yana uni olma, kasha yoki banan bilan ham yeyish mumkin. Undan smuzilar yoki pishiriqlar tayyorlash mumkin.