Yasmiqli salat (салат из чечевицы)

Yasmiqli salat oqsilga va vitaminlarga boy salatdir. U ovqat o‘rnini bosadi va uzoq vaqt qorinni to‘q tutadi. Oson va sog‘lom retsept.

Kerakli mahsulotlar (8-10 portsiya uchun):

350 gr yasmiq (чечевица)
1-2 dona bulg‘or qalampiri
2 dona pomidor
2-3 dona bodring
Yarim bosh ukrop
Yarim bosh petrushka
1.5 limonning sharbati
30 ml atrofida zaytun yog‘i
Tuz va murch

Yasmiqni salat uchun pishirish

Avval 30 minut ivitilgan yasmiqni sovuq suvga solib yumshaguncha pishirib oling. Yasmiq yumshagandan so‘ng tuz soling va yasmiq pishguncha qaynatishda davom eting. Yasmiq pishgach, uning suvini to‘kib oling.

Endi sabzavotlarni tayyorlab oling. Ularning hammasini mayda kvadrat qilib to‘rg‘ab oling. Petrushka va ukropni maydalab to‘rg‘ang.

Limonning sharbati, yog‘ va murchni qopqoqli idishchada 1 minut davomida silkiting, sous quyuqlashadi.

Endi hamma narsani pishgan va sal sovigan yasmiqning ustiga soling. Salatni yaxshilab aralashtiring. Ta’bga qarab tuz soling.

Yasmiqli salat tayyor, uni darrov yoki keyinroq dasturxonga torting.

E’tibor qiling:

Yasmiqni pishirishdan oldin ivitish shart emas, faqat ivitilsa u tezroq pishadi. Asosiysi yasmiq yumshagach keyin tuz solish kerak.

Yasmiqli salat xolodilnikda 2 kungacha yaxshi saqlanadi.

Xohlasangiz pomidor va bodring urug‘ini olib tashlab, keyin salatga soling, ularning suvi salatga kamroq chiqadi. Men bunday qilmadim, shuning uchun salat suvliroq bo‘ldi.